Martin Auer: شه‌ڕی سه‌یر و سه‌مه‌ره‌, ڕاهێنانی مرۆڤه‌ بۆ ژیانێکی پڕ له‌ ئاشتی و دوور له‌ شه‌ڕه‌

   
 

کۆڕێکی شین

Please share if you want to help to promote peace!

Translated by Nader Fathibokani

This translation has not yet been reviewed

خه‌یاڵاتی
کۆڕێکی شین
گۆی خوارده‌مه‌نی
ترس
جارێکیتریش ترس
خه‌ڵکه‌ سه‌یره‌که‌ی سه‌ر گۆی میوه‌جات
کاتێك سه‌ربازه‌کان هاتن
دوو شه‌ڕکه‌ر
شه‌ڕی تیتل و بیبله‌کان له‌سه‌ر گۆی ماڕس
کۆیله‌‌
حیسابکەره‌ باشه‌کان
شه‌ڕی سه‌یر و سه‌مه‌ره‌
پاره‌
چیرۆکی شایه‌کی زۆر دادپەروەر و باش
Download (All stories in one printer friendly file)
Guestbook
About the translator
About the Author
Mail for Martin Auer
Licence
Creative Commons licence agreement

کۆڕێکی شین

نووسه‌ر:  Martin Auer (مارتین ئاوه‌ر)

وه‌رگێران له‌ ئاڵمانییه‌وه‌: نادر فه‌تحی(شوانه‌)

   ڕێگایه‌کی زۆر زۆر دوور له‌ پشت ئه‌ستێره‌کان ره‌نگه‌ هه‌مووشتێك جیاوازی هه‌بێ له‌گه‌ڵ ئێره‌ و لای ئێمه‌. هه‌روه‌ها زۆر دوورتر له‌وێش جیاوازی هه‌بێ له‌گه‌ڵ ئه‌وێ، و ئه‌وێش  به‌ ته‌واوی جیاوازی هه‌بێ به‌ هه‌ڵسه‌نگاندن له‌گه‌ڵ ئێره‌. 

به‌ڵام ئه‌گه‌ر مرۆڤ ڕێگایه‌کی زۆر دوورتر بفڕیبایه‌، زۆر زۆر دوورتر، له‌وێ که‌ هه‌مووشتێك جیاوازی هه‌یه‌ له‌گه‌ڵ جێگاکانی تر، ره‌نگه‌ هه‌میسان هه‌مووشتێک وه‌ك لای ئێمه‌ وا بێت.

له‌و ڕێگا زۆر زۆر دووره‌ ڕه‌نگه‌ گۆیه‌ک هه‌بێ به‌ گه‌وره‌یی زه‌وی و له‌سه‌ر ئه‌و گۆیه‌ کۆمه‌ڵیك مرۆڤ بژین که‌ ته‌واو له‌ ئێمه‌ بچن به‌ڵام به‌و جیاوازییه‌ی که‌ ڕه‌نگی ئه‌وان شین بێت و توانایی ئه‌وه‌یان هه‌بێ که‌  گۆێچکه‌ کانیان کپ که‌ن کاتێك پێیان خۆش نه‌بێ گوێ له‌ شتێك ڕاگرن.

له‌و رێگا دووره‌ و له‌سه‌ر ئه‌و گۆ زۆر دووره‌، ڕه‌نگه‌ جارێك شه‌ڕێکی گه‌وره‌ و مه‌زن به‌ڕێوه‌چووبێ و زۆرێك له‌و مرۆڤه‌ شینانه‌‌ مردبێتن و زۆر منداڵی چکووله‌ به‌ ته‌نیا و بێ دایك و باوك مابێتنه‌وه‌.

له‌سه‌ر ته‌پۆڵکی خانوبه‌ریه‌کی خاپوورکراو به‌ هۆی بۆمباوه‌، کوڕێکی شین دانیشتووه‌ و بۆ دایك و باوكی ده‌گری. جارێکیان یه‌کجار زۆر له‌وێ دانیشت و گریا، به‌ڵام له‌پڕێکدا ئیتر نه‌گریا، چونکه‌ هه‌موو فرمێسکه‌کانی ڕژاندبوو و چیدی فرمێسکی پێ نه‌مابوو. یه‌خه‌ی کراسه‌که‌ی بۆ لای سه‌ره‌وه‌ هه‌ڵداوه‌  و ده‌ستی خسته‌ گیرفانه‌کانیه‌وه‌ و به‌ربووه‌ ڕۆیشتن. ئه‌گه‌ر به‌ردێکی هاتبایه‌ته‌ به‌ر قاچ، به‌ نووکی پێڵاوه‌که‌ی لێی ده‌دا و ئه‌گه‌ر گوڵێکی له‌به‌ر پێ بایه‌، پێی لێ ده‌نا.

کوڕه‌ شینه‌‌که‌ له‌ ڕێگا تووشی سه‌گێکی چکووله‌ی خوێن شیرین هات. سه‌گه‌که‌ سه‌یری کوڕه‌که‌ی کرد و ده‌ستیکرد به‌ کلکه‌ سووته‌ و وه‌دوای که‌وت و وای نیشان دا که‌ ده‌یهه‌وێ ببێ به‌ هاوڕێی.

"بڕۆ‌"! کوڕه‌ شینه‌‌ به‌ سه‌گه‌که‌ی گوت. "تۆ ده‌بێ بڕۆی. ئه‌گه‌ر لای من بمێنیه‌وه‌، ده‌بێ تۆم خۆش بوێ. من ئیتر به‌ درێژایی ژیانم   پێمخۆش نییه‌ که‌سێکیترم خۆش بوێ‌." به‌ڵام سه‌گه‌‌ هه‌ر سه‌یری کوڕه‌که‌ی ده‌کرد و زۆر خوێن شیرنانه‌ کلکه‌سووته‌ی له‌به‌ر ده‌کرد. له‌پڕێکدا کوره‌ شینه‌ چه‌کێکی دۆزیه‌وه‌ که‌ له‌ په‌نا سه‌ربازێکی  کوژراو به‌جێ مابوو. چه‌که‌که‌ی هه‌ڵگرت و ڕووبه‌ڕوی سه‌گه‌ خوێن شیرینه‌که‌ی ڕاگرت و زۆر به‌ تووڕه‌ییه‌وه‌ گوتی: "ئه‌و چه‌که‌ ده‌توانێ بتکووژێت!" سه‌گه‌که‌ له‌ ترسان لێی دوور بۆوه‌ و ڕێگای خۆی گرته‌ به‌ر.

"له‌گه‌ڵ خۆم ده‌تبه‌م!" کوڕه‌ شینه‌ به‌ چه‌که‌که‌ی گوت. "تۆ ده‌بی به‌ هاوڕێیه‌کی باشی من." به‌ چه‌که‌که‌ ته‌قه‌ی له‌ دارێکی مردوو کرد.

دواتر له‌سه‌ر مه‌زرایه‌ك فڕۆکه‌یه‌کی دۆزییه‌وه‌. له‌ ناویدا دانیشت و هه‌وڵی لێخورینی دا. فڕۆکه‌که‌ کاری ده‌کرد.

"ئێستا، چه‌کێکم هه‌یه‌و فڕۆکه‌یه‌ك"، کوڕه‌ شینه‌که‌ به‌ خۆی گوت. "ئه‌و دوانه‌ ئیتر بنه‌ماڵه‌ی منن. من ده‌متوانی سه‌گێکیشم هه‌بێ، به‌ڵام ئه‌گه‌ر‌ ئه‌ویان بکوشتبایه‌، ئه‌وکات هێنده‌ ده‌گریام هه‌تا ده‌مردم."

کوڕه‌که‌ به‌ فڕۆکه‌که‌ هه‌ڵفڕی. له‌پڕێکدا ماڵێکی که‌وته‌ به‌رچاو که‌ دووکه‌ڵی لێ هه‌ڵده‌ستا. "له‌وێ که‌سێك ده‌ژی"، کوره‌ شینه‌که‌ گوتی. به‌ ده‌وری ماڵه‌که‌دا فڕی و له‌ناو په‌نجێره‌که‌وه‌ سه‌یری ناو ماڵه‌که‌ی کرد. ‌ ناو ماڵه‌که‌، ژنێکی پیری تێدابوو و خه‌ریکی چێشت لێنان بوو.

کوڕه‌ شینه‌‌ فڕۆکه‌که‌ی له‌به‌ر ده‌رکه‌ی ماڵه‌که‌ ڕاگرت. چه‌که‌که‌ی هه‌ڵگرت و چووه‌ ناو ماڵه‌که‌وه‌. "من چه‌کم پێیه‌!" کوڕه‌ شینه‌‌ به‌ پیرێژنه‌که‌ی گوت. "ده‌بێ شتێكم بۆ خواردن بده‌یتێ!"

"من هه‌ر به‌ بێ ئه‌وه‌ش شتێکم بۆ خواردن ده‌دایه‌ی"، ژنه‌ پیره‌که‌ گوتی، "ده‌توانی به‌ ئه‌رخه‌یانی چه‌که‌که‌ت دابنێیت."

"تۆ نابێ له‌گه‌ڵ من میهره‌بان بیت!" کوڕه‌ شینه‌که‌ زۆر به‌ تووڕه‌ییه‌وه‌ گوتی. "چه‌که‌که‌م ده‌توانێ بتکووژێت!"

ژنه‌ پیره‌که‌ خوارده‌مه‌نی دایه،‌ و ئه‌و هه‌میسان هه‌ڵفری.

کوڕه‌ شینه‌که‌ ئا به‌م شێوه‌یه‌ ژیانی ده‌برده‌سه‌ر. جیگایه‌کی له‌ کاوله‌ ماڵێکدا بۆ خۆی ته‌رخان کردبوو و له‌وێ به‌ شاراوه‌یی‌ ده‌ژیا. ئه‌گه‌ر برسی بایه‌، ده‌فڕی بۆ جێگایه‌ك که‌ خه‌ڵکی لێ بووایه‌، و به‌ زه‌بری چه‌که‌که‌ی مه‌جبووری ده‌کردن خوارده‌مه‌نی پێ بده‌ن.

زۆربه‌ی کاتیش به‌ فڕۆکه‌که‌ی به‌سه‌ر مه‌یدانی شه‌ڕه‌کاندا هه‌ڵده‌فڕی و له‌ته‌ چه‌که‌کان و شتومه‌کی پێویست بۆ سه‌یاره‌ و ئاسنه‌واڵه‌کانیتری کۆ ده‌کرده‌وه‌ که‌ له‌ مه‌یدانی شه‌ڕدا به‌جێ مابوون و ده‌یبردنه‌ جێگا نهێنیه‌که‌ی خۆی.

"من ده‌بێ به‌و شتومه‌کانه‌ی کۆمکردوونه‌ته‌وه‌ رۆبۆتێکی گه‌وره‌ و مه‌زن دروست بکه‌م" کوڕه‌که‌ له‌به‌رخۆیه‌وه‌ ده‌یگوت. "رۆبۆته‌که‌ ده‌بێ سه‌د میتر درێژ بێ و سه‌دهه‌زار تۆن قورس بێت و له‌ ناو سه‌ریدا جێگای کۆنتڕۆڵی ڕۆبۆته‌که‌ بۆخۆم ته‌رخان ده‌که‌م. ئه‌وکات من زۆر به‌هێز ده‌بم و که‌س ناتوانێ خه‌سارێکم پێ بگه‌ێینێت."

رۆژێك کیژۆڵه‌یه‌ک به‌لای جێگا نهێنییه‌که‌یدا‌ تێپه‌ڕ بوو. کوڕه‌که‌ به‌ چه‌که‌که‌یه‌وه‌ په‌ڕیه‌ ده‌ره‌وه‌ و گوتی: "ده‌بێ لێره‌ بڕۆی! چه‌که‌که‌م ده‌توانێت بتکووژێ!" 

"خۆ من هیچم له‌ تۆ ناوێ"، کچه‌که‌ گوتی. "ته‌نیا هاتووم بزانم کارگ له‌ ده‌شتێ سه‌ریان هه‌ڵداوه‌."

"ده‌بێ لێره‌ بڕۆی!" کوڕه‌که‌ گوتی. "پێم خۆش نییه‌ هیچکه‌س له‌لام بێت!"

" لێره‌ تاك و ته‌نیای؟" کچه‌که‌ لێی پرسی.

"نا"، کوڕه‌که‌ گوتی، "من چه‌کێك و فرۆکه‌یه‌کم هه‌یه‌ و ئه‌وانه‌ بنه‌ماڵه‌ی منن. رۆژێکیش دێ که‌ رۆبۆتێکی گه‌وره‌ و مه‌زنم ده‌بێ!"

"هیچ که‌سێکی زیندووت لا نییه‌؟"، کچه‌که‌ گوتی.

"ده‌متوانی سه‌گێکم هه‌بوایه‌. به‌ڵام ئه‌گه‌ر بیانکوشتبایه‌، هێنده‌ ده‌گریام تا ده‌مردم."

"منیش هیچ که‌سێکیم نییه‌"، کچه‌که‌ گوتی. "ئێمه‌ ده‌توانین پێکه‌وه‌بین."

"من پێویستیم به‌ که‌سێك نییه‌ که‌ چه‌ك بتوانێ بیکووژێ."

"که‌ وابوو ده‌بێ له‌دوای که‌سێك بگه‌ڕێی که‌ به‌ چه‌ك نه‌کووژرێت!"  کچه‌که ئه‌وه‌ی گوت‌ و به‌په‌له‌ ڕۆیشت و به‌جێی هێشت.

کوڕه‌که‌ به‌و له‌ت و کوتانه‌ و ئاسنه‌واڵانه‌ی کۆی کردبوونه‌وه‌ رۆبۆتێکی گه‌وره‌ و مه‌زنی دروستکرد و له‌ ناویدا دانیشت. له‌ سه‌رسه‌ره‌وه‌ و له‌ ناو سه‌ری رۆبۆته‌که‌، که‌ جێگای کۆنتڕۆڵ بوو، جێگای بۆ خۆی ته‌رخان کرد.

پاشان ده‌ستیکرد به‌ لێخوڕینی رۆبۆته‌ گه‌وره‌که‌ی، به‌ناو وڵاتاندا. به‌هه‌ر جێگایه‌كدا ده‌‌ڕۆیشت، کاتێك خه‌ڵکی ئه‌و ڕۆبۆته‌ مه‌زنه‌یان ده‌دیت  ده‌یانقیژاند و له‌به‌ری هه‌ڵده‌هاتن. به‌ڵام له‌و رۆبۆته‌ مه‌زنه‌ نه‌یانده‌توانی خۆ ڕزگار که‌ن.

کوڕه‌که‌ له‌ناو ژووری کۆنتڕۆڵی رۆبۆته‌که‌دا میکرۆفۆنێکی دامه‌زراندبوو که‌ هه‌رشتێکی بگوتبایه‌ له‌ ده‌می رۆبۆته‌که‌وه‌ ده‌هاته‌ ده‌رێ و خه‌ڵکی گوێیان لێ ده‌بوو.

"ئایا که‌سێک له‌ ناو ئێوه‌ دا هه‌یه‌ که‌ چه‌ك نه‌توانێ بیکووژێ؟" ڕۆبۆت نه‌ڕاندی‌. به‌ڵام رووی له‌ هه‌رجێگایه‌ك ده‌کرد خه‌ڵکی له‌به‌ری هه‌ڵده‌هاتن و که‌سی نه‌دۆزییه‌وه‌ که‌ چه‌ك نه‌توانێ بیکووژێ.

رۆژێك له‌ ڕۆژان له‌ ژووری کۆنتڕۆڵه‌وه‌ بینی که‌ که‌سێك زیاده‌ له‌و هه‌موو خه‌ڵکه‌ی له‌به‌ری هه‌ڵده‌هاتن، ڕاوه‌ستاوه‌ و له‌به‌ری هه‌ڵنایه‌ و هه‌وڵ ده‌دا شتێکی پێ بڵێ. به‌ڵام به‌هۆی ئه‌وی که‌ کوڕه‌که‌ له‌ سه‌ره‌وه‌ بوو و مه‌ودای مابه‌ینیان دوور بوو، ده‌نگی پێی نه‌ده‌گه‌یشت و لێی تێ نه‌ده‌گه‌یشت.

"ڕه‌نگه‌ ئه‌وه‌، که‌سێك بێ که‌ چه‌ك نه‌توانی بیکووژێ؟ کوڕه‌که‌ له‌به‌ر خۆیه‌وه‌ گوتی و له‌ رۆبۆته‌که‌ دابه‌زی. به‌ڵام ئه‌وکه‌سه‌ پیرێژنه‌که‌ بوو که‌ ئه‌وکات نانی دابویه‌. "ده‌تهه‌ویست شتێك به‌ من بڵێی؟" کوره‌که‌ گوتی.

"به‌ڵێ" پیرێژنه‌که‌ گوتی. "من بیستوومه‌ که‌سێك هه‌یه‌، چه‌ك ناتوانێ بیکووژێ!" 

"ده‌ی باشه‌ ئه‌وکه‌سه‌ کێیه‌؟" کوڕه‌که‌ گوتی.

"ئه‌و پیاوێکی پیره‌ که‌ له‌وسه‌ره‌ و له‌سه‌ر مانگ ده‌ژی."

"که‌ وابوو ده‌بی ئه‌وکه‌سه‌ بدۆزمه‌وه‌"، کوڕه‌که‌ گوتی، "چونکه‌ من هیچکه‌سێکم ناوێ که‌ چه‌ك بتوانێ بیکووژێ". ده‌ستی به‌ دوگمه‌یه‌کی رۆبۆته‌که‌و نا و له‌پڕێکدا رۆبۆته‌که‌ بوو به‌ که‌شتییه‌کی فه‌زایی و هه‌ڵفڕی بۆ سه‌ر مانگ.

کوڕه‌که له‌سه‌ر مانگ ‌ ماوه‌یه‌کی زۆر گه‌ڕا. به‌ڵام له‌پڕێکدا پیاوه‌ پیره‌که‌ی دۆزییه‌وه‌. پیاوه‌که‌ له‌ پشت تله‌سکۆپێكی گه‌وره‌ دانیشتبوو و له‌و سه‌ره‌وه‌ سه‌یری گۆ‌ شینه‌که‌ی ده‌کرد.

"ئایا تۆ ئه‌و که‌سه‌ی که‌ چه‌ك ناتوانێ بیکووژێ؟" کوڕه‌که‌ پرسیاری له‌ پیاوه‌پیره‌که‌ کرد.

"پێموایه، وایه‌‌" پیاوه‌که‌ وه‌ڵامی داوه‌.

"ئه‌دی له‌ ناو ئه‌و دووربینه‌وه چی ده‌بینی‌؟"

"من سه‌یری مرۆڤی سه‌ر پلانێتی شین ده‌که‌م له‌و خواره‌."

"ده‌توانم لای تۆ بمێنمه‌وه‌؟" کوڕه‌که‌ پرسیاری له‌ پیاوه‌ پیره‌که‌ کرد.

"ڕه‌نگه‌"، پیاوه‌ پیره‌که‌ وه‌ڵامی داوه‌. "بۆچی پێتخۆشه‌ لای من بمێنیه‌وه‌؟"

"چونکه‌ من پێمخۆش نییه‌ لای که‌سێك بم که‌ مرۆڤ بتوانێ بیکووژێ، کاتێك دایك و باوکمیان کوشت هێنده‌ گریام که‌ ئیتر فرمێسکم پێ نه‌ما. من ده‌متوانی سه‌گێکم هه‌بێ، به‌ڵام ئه‌گه‌ر ئه‌ویشیان بکوشتبایه‌ له‌به‌ر گریان ده‌مردم. من ده‌متوانی لای پیرێژنێك یا له‌ لای کچێکیش  بمێنمه‌وه‌. به‌ڵام هیچیان له‌ به‌رانبه‌ر چه‌کدا ناتوانن خۆ ڕابگرن و ئه‌گه‌ر ئه‌وانیشیان بکوشتبایه‌ ده‌بوو هێنده‌  بگریم تا ده‌مردم."

"زۆر باشه‌"، گوتی پیاوه‌ پیره‌که‌. "تۆ ده‌توانی لای من بمێنیه‌وه‌. هیچ که‌س ناتوانێ من بکووژێ، چونکه‌ لێره‌ چه‌کی لێ نییه‌."

"هه‌مووی ته‌نیا له‌به‌ر ئه‌و هۆیه‌یه؟‌‌"، کوڕه‌که لێی پرسی‌.

"به‌ڵێ!" گوتی پیاوه‌ پیره‌که‌.

"به‌ڵام من چه‌که‌که‌م له‌گه‌ڵ خۆم هێناوه‌ته‌ ئێره‌."

"حه‌یف" گوتی پیاوه‌ پیره‌که، "ئێستا ئیتر ناتوانی لای من بمێنیه‌وه‌. چه‌که‌که‌ت ده‌توانێ من بکووژێت."

"که‌ وابوو ئیتر من ده‌بێ بڕۆم" کوڕه‌که‌ گوتی.

"به‌ڵێ!" پیاوه‌ پیره‌که‌ گوتی.

"حه‌یف!" کوڕه‌که گوتی‌.

"بۆی ناره‌حه‌تی؟" پیاوه‌ پیره‌که‌ لێی پرسی.

"به‌ڵێ!" کوڕه‌که‌ گوتی. "من له‌ ناخی دڵمه‌وه‌ پێمخۆشبوو لێره‌ بمێنمه‌وه‌."

"بۆی هه‌یه‌ بتوانی چه‌که‌که‌ت فڕێ ده‌ی؟" پیاوه‌ پیره‌که‌ گوتی.

"ڕه‌نگه!‌"، کوڕه‌که گوتی‌.

"ئه‌وکات ده‌توانی لای من بمێنیه‌وه‌"، پیاوه‌ پیره‌که گوتی‌.

"ڕه‌نگه‌!"، کوڕه‌که گوتی‌. "ئه‌دی لای تۆ چی بکه‌م؟"

"ده‌توانی سه‌یری ئه‌و تله‌سکۆپه‌ بکه‌ی. ڕه‌نگه‌ بتوانی هۆی ئه‌وه‌ بدۆزیه‌وه‌ که‌ خه‌ڵک له‌و خواره‌ بۆچی به‌‌ دوای شه‌ڕدا ده‌گه‌ڕێن."

"باشه‌، بۆچی به‌‌دوای شه‌ڕدا ده‌گه‌ڕێن؟"

"منیش نازانم. ڕه‌نگه‌ هۆیه‌که‌ی ئه‌وه‌ بێت که‌ زانیارییان له‌سه‌ر یه‌كتر زۆر که‌م بێت. یاخود هێنده‌ زۆرن و ژیانیان وه‌ها ئاڵۆزه‌، که‌ که‌س نازانێ کرده‌وه‌کانیان چی به‌دوادا دێت. یا نازانن ئه‌و گۆشته‌ی که‌ ده‌یخۆن له‌ کوێوه‌ دێت، یا ئه‌و نانه‌ی دروستی ده‌که‌ن، بۆکوێ ده‌چێت. یا ئه‌وی  نازانن ئه‌و ئاسنه‌ی له‌ ژێر زه‌وی ده‌یهێننه‌ ده‌رێ، که‌ره‌سه‌ی خانووبه‌ره‌ سازی پێ ساز ده‌کرێ یا تانك و تۆپی  ماڵوێرانکه‌ر. ڕه‌نگه‌ ئه‌گه‌ر ئه‌وان بیانتوانیبایه‌ له‌وسه‌ره‌وه‌ سه‌یری خۆیان بکه‌ن، زۆر شتیان لێ حاڵی بایه‌ و باشتر تێگه‌یشتبایه‌ن."

"ده‌بێ مرۆڤ ئه‌وه‌یان پێ پیشان بده‌ن." کوڕه‌که‌ گوتی.

"ڕه‌نگه‌!"، پیاوه‌ پیره‌که‌ وه‌ڵامی داوه‌. "به‌ڵام بۆ ئه‌و کاره‌ من پیر بووم و ئیتر زۆر ماندووم."

لێره‌دا کوڕه‌که‌ چه‌که‌که‌ی فڕێدا خواره‌وه‌ و به‌ ناو کاکه‌شاندا که‌وته‌ سه‌ر گۆکه‌‌ و ورد و پرد بوو.

کوڕه‌ شینه‌که‌ بۆ ماوه‌یه‌کی یه‌کجار زۆر له‌سه‌ر مانگ و لای پیاوه‌ پیره‌که‌ مایه‌وه‌ و له‌وسه‌ره‌وه‌ به‌ تله‌سکۆپه‌که‌ سه‌یری مرۆڤی سه‌ر گۆی شینی ده‌کرد. ره‌نگه‌ رۆژێك گه‌ڕابێته‌وه‌ بۆ سه‌ر گۆیه‌که‌ و به‌ خه‌ڵکی گوتبێ هه‌ڵه‌کانیان چی بوون.

   
 

This site has content self published by registered users. If you notice anything that looks like spam or abuse, please contact the author.